AGS segir kreppuna alvarlegri en áður var talið

Í nýrri skýrslu frá Alþjóðagjaldeyrissjóðnum (AGS) segir að núverandi kreppa muni verða meira langvarandi og dýpri en áður var talið. Ástæða sé til að hafa áhyggjur af því hve kreppan nú sé samstíga Kreppunni miklu á þriðja áratuginum.

Þá gerir AGS ráð fyrir að uppsveiflan í lok kreppunnar verði veikburða og taki langan tíma. Í skýrslunni eru auðugri þjóðir heims gagnrýndar fyrir að hafa ekki spýtt nægilega miklu fjármagni í hagkerfi sín til að vinna á móti þessu vandamáli. Bloomberg fréttaveitan fjallar um skýrsluna í dag.

„Núverandi niðursveiflan fylgir náið og er samhliða djúpri fjármálakreppu sem er gjaldgæft fyrirbirgði á eftirstríðsárunum," segir í skýrslunni. Áður hefur komið fram að AGS reiknar með að hagvöxturinn í heiminum í heild verði neikvæður um eitt prósentustig.

AGS vill að fjármálastefnan til skamms tíma miði að einbeittum aðgerðum til að auka eftirspurn en að þjóðir passi sig jafnframt til lengri tíma að láta opinberar skuldir sínar ekki fara úr böndunum.

Skýrslan er birt nú skömmu fyrir hálfsárslegan fund AGS og Heimsbankans en þann fund munu einnig sitja fjármálaráðherrar G7 ríkjanna. Skýrslan í heild verður birt þann 22. apríl n.k. og verður þá að finna í henni spár fyrir einstök lönd.