Magma Energy stefnir hátt

Stjórnarformaður Magma Energy segir að stefna félagsins sé að verða eitt stærsta fyrirtæki í heimi á sviði jarðhitaorku. Félagið hefur nú hafið viðræður um kaup á hlut Orkuveitu Reykjavíkur í HS Orku.

Stjórn Orkuveitu Reykjavíkur ákvað í gær að ganga til viðræðna við kanadíska fyrirtækið Magma Energy um kaup þess á hlut Orkuveitu Reykjavíkur í HS Orku. Hluturinn hefur verið í opinberu söluferli frá því nú í vor. Um er að ræða 32% hlut og má gera ráð fyrir að verðmæti hans sé allt að 12 milljarðar króna.

Magma Energy eignaðist nýverið 11% hlut í HS Orku. Eignarhlutur félagsins í HS Orku verður því um 43% í heild, ef kaup félagsins á hlut Orkuveitu Reykjavíkur ganga eftir.

„Stefna Magma Energy er að verða eitt stærsta fyrirtæki í heimi á sviði jarðhitaorku," segir Ross Beaty, stjórnarformaður og forstjóri Magma Energy. Hann telur að fjárhagslegur styrkur fyrirtækisins muni koma Íslendingum til góða. Hann segir mikla jarðorku vera til staðar hér á landi sem og afar hæft starfsfólk í orkuiðnaðinum.