Þjónustujöfnuður neikvæður um 2,9 milljarða

Útflutningur þjónustu á fyrsta ársfjórðungi er því samkvæmt bráðabirgðatölum 53,1 milljarður kr. og innflutningur þjónustu 56,0 milljarðar kr. Þjónustujöfnuður við útlönd á fyrsta ársfjórðungi er því neikvæður um 2,9 milljarða kr.

Þetta kemur fram á vefsíðu Hagstofunnar. Þar segir að á síðustu árum hafa komið fram æ ríkari óskir, jafnt alþjóðastofnana sem annarra notenda, um ítarlegri sundurliðun og landaskiptingu gagna um þjónustuviðskipti við útlönd en hingað til hefur verið unnt að birta.

Seðlabanki Íslands hefur unnið gögn um þjónustuviðskipti að mestu út frá upplýsingum um gjaldeyrisviðskipti fyrirtækja sem fram fara í gegnum íslenska banka. Í þeim gögnum er ekki að finna mikla sundurliðun á þeirri þjónustu sem seld er eða keypt né heldur skiptingu þessara viðskipta eftir löndum.

Niðurstöðurnar sem nú eru birtar fyrir fyrsta ársfjórðung 2009 munu að öllum líkindum breytast eftir því sem fyllri upplýsingar berast og verkinu vindur fram. Á þessari stundu er ekki unnt að birta ítarlega sundurliðun eftir tegund þjónustu né eftir löndum eins og ætlunin var.

Stór fyrirtæki skila Hagstofunni gögnum fyrir fyrsta ársfjórðung 2009 en niðurstöður fyrir lítil og meðalstór fyrirtæki á fyrsta ársfjórðungi 2009 eru metin út frá gögnum fyrir árið 2008.

Í eðlilegu árferði er slíkt mat góð og gild aðferð, en þar sem miklar breytingar hafa orðið á umhverfi fyrirtækja í kjölfar efnahagshrunsins má áætla að gögn fyrir 2008 séu ekki nógu góður grundvöllur til að meta niðurstöður fyrir árið 2009.