Búist við áframhaldandi lækkun fasteignaverðs

Velta á fasteignamarkaði á höfuðborgarsvæðinu var 5,8 milljarðar króna í nýliðnum júlímánuði samkvæmt upplýsingum Fasteignaskrár Íslands. Velta jókst um tæpan fjórðung frá fyrri mánuði en dróst að sama skapi saman um helming frá sama tíma árinu áður. Búist er við áframhaldandi lækkun fasteignaverðs. Þetta kemur fram í hagsjá Landsbankans.

Það sem af er ári er velta á fasteignamarkaði á höfuðborgarsvæðinu meira en helmingi lægri en á sama tíma í fyrra og tæpur fimmtungur af því sem var fyrstu sjö mánuði ársins 2007. Raunar hefur Fasteignaskráin ekki áður mælt svo litla veltu í janúar - júlí svo langt sem gögnin ná. Fjöldi kaupsamninga sem þinglýst var í mánuðinum jókst samanborið við fyrri mánuð en líkt og með veltuna voru þeir umtalsvert fleiri á sama tíma í fyrra.

Fasteignamarkaðurinn virðist samkvæmt þessu enn vera að hægja á sér eftir mikinn uppgang undanfarin misseri.

Fasteignaverð er hefur nú þegar lækkað um 13% að nafnvirði frá því að það náði hámarki í janúar 2008, en lækkun fasteignaverðs hefur svo aftur áhrif á mælingu á vísitölu neysluverðs þar sem húsnæðisliðurinn vegur nokkuð þungt. Lækkunin hefur þannig haldið aftur af verðbólgu síðustu mánuði eftir að hafa knúið hana áfram þegar fasteignaverð hækkaði hratt í uppsveiflunni sem átti sér stað á fasteignamarkaði á árunum 2004-2007.

Enn má eiga von á frekari ládeyðu á fasteignamarkaði en margt bendir til þess að makaskiptasamningar dragi úr verðlækkun húsnæðisverðs um þessar mundir.

Á meðan búist er við áframhaldandi verðlækkun á fasteignum má gera ráð fyrir að fólk í íbúðaleit haldi að sér höndum og fresti kaupum. Það verður því ekki fyrr en fólk í fasteignahugleiðingum telur botni náð að umsvif á þessum markaði eru líkleg til að glæðast á nýjan leik.