Greining: Spáir 9% ársverðbólgu í þessum mánuði

Greining Íslandsbanka spáir því að vísitala neysluverðs (VNV) muni hækka um 0,5% í október. Gangi spáin eftir mun 12 mánaða verðbólga lækka úr 10,8% í 9%, enda dettur þá út úr 12 mánaða taktinum október á síðasta ári.

Í Morgunkorni greiningarinnar segir að í þeim mánuði hækkaði VNV um 2,1%. Síðustu dreggjar útsöluloka munu væntanlega lyfta verði á fötum og skóm nokkuð, ásamt öðrum varningi, og gerir greiningin ráð fyrir að VNV hækki um 0,2% vegna þessa. Þá eru enn að seytla inn í vöruverð áhrif af lækkun krónu á fyrri helmingi ársins.

Í spánni er ráð fyrir að húsnæðisliður vísitölunnar verði óbreyttur milli mánaða. Raunar eru vísbendingar af markaði frekar til þeirrar áttar að markaðsverð íbúðarhúsnæðis kunni að hafa hækkað milli mánaða en hitt. Hins vegar hefur eldsneyti lækkað nokkuð milli mánaða og hefur það áhrif til tæplega 0,1% lækkunar VNV að mati okkar.

„Ársfjórðungurinn sem nú fer í hönd einkennist af því að í hverjum mánuði dettur út úr 12 mánaða verðbólgunni veruleg hækkun á VNV frá sama tímabili í fyrra. Vísitala neysluverðs hækkaði um 5,5% á síðasta fjórðungi ársins 2008, en við gerum samtals ráð fyrir 1,1% hækkun VNV það sem eftir lifir árs," segir í Morgunkorninu.

„Verðbólgan mun samkvæmt þessu hjaðna hratt og verða ríflega 6% í árslok. Hins vegar gæti slegið í bakseglin á fyrsta fjórðungi næsta árs, enda allar líkur á að hækkun vörugjalda og breytingar á virðisaukaskattkerfinu valdi talsverðri hækkun VNV í upphafi ársins. Frá og með öðrum fjórðungi næsta árs teljum við þó að í hönd fari tímabil lítillar hækkunar VNV og áætlum við að vísitalan hækki um rétt rúmlega 2% yfir árið 2010."

Greining segir ennfremur að þeir þættir sem mesta óvissu skapa um spánna, þegar lengra er litið, eru gengisþróun krónu, hvernig aðstæður á vinnumarkaði kunna að þróast, hvenær húsnæðismarkaður tekur að rétta úr kútnum og hvort frekari hækkun óbeinna skatta sé í farvatninu eftir næstu áramót.

„Við gerum ráð fyrir að krónan veikist lítillega fram á næsta ár en síðan taki við hægfara styrking. Á vinnumarkaði reiknum við með að stöðugleikasáttmála stjórnvalda og aðila vinnumarkaðr haldi í stórum dráttum, og að hækkun launa verði því hófleg á spátímanum. Þá teljum við að húsnæðisverð muni fara lækkandi fram undir lok næsta árs, en eftir það taki við hægfara hækkun," segir í Morgunkorninu.

„Þótt samanlögð óvissa vegna þessara þátta sé vissulega afar mikil má segja að hún vegi til gagnstæðrar áttar meðal einhverra þeirra. Til að mynda má ætla að dýpki kreppan og dragist á langinn muni það leiða til frekari gengislækkunar krónu, en að á móti muni laun síður hækka og húsnæðisverð lækka meira en ella."