FIH meðal þeirra sem tryggja hlutafjárútboð Sjælsö Gruppen

FIH bankinn er meðal þeirra banka sem sölutryggja hlutafjárútboð hjá Sjælsö Gruppen, stærsta fasteignafélagi Danmerkur. Straumur á hlut í Sjælsö gegnum eignarhaldsfélagið SG Nord Holding.

Hlutabréfaútboðið verður með forkauprétti hjá núverandi hluthöfum og er ætlunin að afla 505 milljóna danskra kr. með því. Gefnir verða út 50,5 milljón hlutir og þeir boðnir núverandi hluthöfum á verðinu 10 danskar kr.á hlut.

FIH bankinn, sem er meðal helstu lánadrottna Sjælsö Gruppen, mun sölutryggja 375 milljóna danskra kr. af útboðinu í heild áamt Amagerbanken og Viscardi AG Investment Banking.

Í frétt um málið í Jyllands Posten segir að SG Nord Holding hafi fallið frá forkauprétti sínum í þessu hlutafjárútboði en það átti rétt á að kaupa 13.000.000 hluti eða fyrir 130 milljónir danskra kr.

FIH bankinn er sem kunnugt er í eigu skilanefndar Kaupþings en Seðlabankinn á allsherjarveð í öllum hlutabréfum bankans eftir lánveitingu til Kaupþings skömmu fyrir bankahrunið í fyrra.

Straumur heldur á 15% eignarhlut í Sjælsö Gruppen í gegnum SG Nord Holding. Sá hlutur var áður í eigu Björgólfs Thor Björgólfssonar í gegnum félagið Novator Property. Raunar er búið að skipta um nafn á því félagi yfir í Cube Property þar sem Novator nafnið þótti orðið afleitt til notkunnar í viðskiptum í Danmörku.