Icelandair hagnaðist um 3 milljarða í júlí

Rekstur Icelandair Group samstæðunnar gekk vel í júlí. Samkvæmt óendurskoðuðu uppgjöri var hagnaður fyrir fjármagnsliði og afskriftir 0,3 milljörðum hærri en í júlí 2008 eða 3,0 milljarðar króna.

Í tilkynningu segir að samsavarandi hagnaður íslenskra dótturfélaga samstæðunnar var 1,1 milljarði, eða 57%,hærri en í júli 2008 og munar þar mestu um mikinn bata í rekstri Icelandair.

Rekstur Travel Service í Tékklandi gekk ágætlega í mánuðinum en gjaldfærsla vegna olíuvarna veldur því að afkoman er lakari en á sama tíma og í fyrra. Enn er unnið að endurskipulagningu á rekstri SmarLynx og var afkoma félagsins í júlí nokkru lakari en á sama tíma í fyrra.

Hagnaðarspá Icelandair Group fyrir árið 2009 er óbreytt eða 6,5 milljarðar króna fyrir fjármagnsliði og afskriftir. Miðað við núverandi forsendur lítur rekstur samstæðunnar ágætlega út það sem eftir er ársins og er útlit fyrir að hagnaðurinn verði hærri en upphaflegar félagsins áætlanir fyrir árið gerðu ráð fyrir.