Sala hljóðrita dróst saman um 31% milli ára

Sala hljóðrita dróst saman um 31 prósent milli áranna 2008 og 2007 í eintökum talið. Á síðasta ári seldust ríflega 446.000 eintök af innlendum og erlendum hljóðritum á heildsölustigi sem er 200.000 eintökum færra en árið á undan.

Þetta kemur fram á vefsíðu Hagstofunnar. Þar segir að heildarverðmæti seldra hljóðrita á heildsölustigi á síðasta ári nam um 592 milljónum króna, sem jafngildir um 950 milljónum króna á smásölustigi, að virðisaukaskatti meðtöldum. Inni í tölum um sölu hljóðrita eru geisladiskar, hljómplötur og snældur.

Frá árinu 2005 hefur sala hljóðrita dregist saman um 46 af hundraði, eða um 377.000 eintök. Hæstum hæðum náði salan árið 1999 en þá seldust á heildsölustigi 868.000 eintök, eða 422.000 fleiri eintök en á síðasta ári. Á síðasta ári nam sala hljóðrita um 1,4 eintökum á íbúa samanborðið við ríflega þrjú eintök er best lét árið 1999.

Vafalaust má að nokkru rekja skýringu á þeim samdrætti sem orðið hefur í sölu hljóðrita til niðurhals tónlistar af Netinu, bæði löglegs og ólöglegs. Inni í tölum um sölu hljóðrita er ekki meðtalin sala hljóðrita með niðurhali yfir Netið.

Markaðshlutdeild innlendra hljóðrita hefur aukist nær jafnt og frá aldamótum. Fram að þeim tíma nam hlutur innlendra útgáfu að jafnaði um 40 af hundraði, en á síðasta ári var hlutdeild innlendrar útgáfu 71 prósent talið í seldum eintökum. Söluverðmæti innlendrar útgáfu var 72 af hundraði af heildarsölunni á síðasta ári.