Rekstri Verðbréfunar hætt, NBI kaupir skuldabréfin

Stjórn Verðbréfunar hf. hefur leitað til eiganda félagsins um að rekstri Verðbréfunar hf. verði hætt. Sú ákvörðun hefur verið staðfest af NBI hf.(Nýji Landsbankinn). Ákveðið hefur verið að NBI hf. kaupi útistandandi skuldabréf Verðbréfunar hf. á sama verði og uppgreiðsluvirði safnbréfa félagsins.

Þetta kemur fram í tilkynningu til kauphallarinnar. Þar segir að stjórnarfundur Verðbréfunar hf. haldinn í gær þar sem árshlutareikningur félagsins fyrir janúar til júní 2009 var lagður fram og samþykktur.

Starfsemi Verðbréfunar hf. var í lágmarki á tímabilinu. Lánasafn Verðbréfunar hefur lækkað frá 31. desember 2008 um 1,7%. Útdráttur skuldabréfa hefur verið í jafnvægi á tímabilinu og verið dregið út úr safnbréfaflokkum í samræmi við inngreiðslur lána. Rekstrarhagnaður Verðbréfunar hf. janúar til júní 2009 var neikvæður um 129.000 kr. fyrir og eftir útreikning skatta.

Heildareignir félagsins hafa lækkað um 18 miljónir króna frá 31. desember 2008 eða um 4,7%. Eigið fé félagsins lækkaði á sama tíma um 129.000 kr. frá fyrra ári.