Hafna milljarðakröfum baugsfjölskyldunnar í Baug

Skiptastjórar þrotabús Baugs hafna rúmlega átta milljarða króna kröfu félaganna Gaums og Haga, en þau eru bæði í eigu Jóns Ásgeirs Jóhannessonar og fjölskyldu. Alls eru tæplega nítján prósent krafna samþykktar, en líklegt er að dómstólar muni úrskurða um hluta krafnanna.

Alls nema kröfur í þrotabúið 319,4 milljörðum íslenskra króna. Skiptastjórar samþykkja rúma 59,6 milljarða eða um 18,6% af heildarkröfunum. Meðal þeirra krafna sem hafnað eru kröfur Gaums og Haga, en þessi félög í eigu Jóns Ásgeirs Jóhannessonar og fjölskyldu.

Gaumur gerir kröfu upp á rúma 4,6 milljarða króna. Hagar gera kröfu upp á rúma 3,6 milljarða. Báðum kröfunum er hafnað en þær falla undir almennar kröfur.

Stórum hluta af kröfum gömlu viðskiptabankanna er einnig hafnað. Glitnir gerir kröfu upp á rúma 46,8 milljarða. 6,3 milljarðar eru samþykktir.

Landsbankinn gerir kröfu upp á samtals 96,7 milljarða en er hafnað. Þá er 26 milljarða króna kröfu Kaupþings einnig hafnað. Kröfur Landsbankans falla undir veðkröfur en bankinn hefur þegar gengið að veðum í BG Holding í Bretlandi.

Áætla má að það muni taka mörg ár að meta verðmæti þeirra veða en það sama má segja um önnur veð. Þá gera fyrrverandi starfsmenn Baugs kröfur í þrotabúið upp á rúmar 65 milljónir, 31 milljón er samþykkt en neitað er að greiða fyrir iðgjöld, bifreiðastyrk, bónusgreiðslur og greiðslu húsaleigu.

Samkvæmt heimildum fréttastofu er líklegt einhverjar af þeim kröfum sem nú er búið að hafna verði samþykktar eftir að skiptastjórar hafa fengið ítarlegri gögn frá kröfuhöfum. Það má þó búast við því að dómstólar muni úrskurða um hluta krafnanna takist ekki að jafna ágreining í framhaldi af skiptafundi í næstu viku.