Stjórnvöld hafa ekki fengið staðfestingu á dagskrá AGS

Forsætisráðuneytið hefur ekki fengið staðfestingu á því að Ísland sé komið á dagskrá fundar framkvæmdastjórnar Alþjóðagjaldeyrissjóðsins.

Eins og fréttastofa greindi frá fyrr í morgun kemur fram á dagskránni, sem birt er á vef Aljþóðagjaldeyrissjóðsins, að taka eigi fyrir fyrstu endurskoðun á efnahagsáætlun Íslands og AGS þann 14. september næstkomandi. Þessi endurskoðun hefur dregist mjög, en hún átti upphaflega að fara fram í febrúar síðastliðinn.

Starfsmaður Alþjóðagjaldeyrissjóðsins á Íslandi sagði í samtali við fréttastofu að hún gæti ekki staðfest að Ísland væri komið á dagskrá en hún vildi heldur ekki útiloka það.