Búist við frekari hækkunum á neysluvörum

Hagfræðideild Landsbankans spáir því að verðbólga milli júlí og ágúst muni mælast 0,9%. Í mælingunni er búist við nokkurri hækkun á fatnaði og skóm vegna þess að sumarútsölum er víða lokið og nýjar vörur komnar í margar verslanir. Auk þess hafa hækkanir á mjólkurvörum verið boðaðar frá byrjun þessa mánaðar.

Frá síðustu verðbólgumælingu hefur auk þess orðið 3-4% verðhækkun á eldsneyti en áhrif hennar eru um 0,15 prósentur til hækkunar vísitölunnar. Þá má búast við hækkunum á ýmsum öðrum innflutningsvörum svo sem matvöru og bifreiðum.

Aftur á móti bendir flest til þess að fasteignaverð sé ennþá á niðurleið en í spá hagfræðideildar er gert ráð fyrir um 0,1-0,2 prósenta áhrifum til lækkunar vísitölunnar af þeim sökum. Gangi spá Hagfræðideildarinnar eftir verður tólf mánaða verðbólga óbreytt frá fyrri mánuði eða 11,3%.

Útsölum víða lokið

Í ágúst og september má búast við nokkurri verðhækkun á fatnaði og skóm vegna útsöluloka en hækkunin kemur í kjölfar þónokkurra verðlækkana í júlí. Lokadagar sumarútsalanna fóru víða fram aðra helgina í júlí og því eru nýjar vörur nú komnar í margar verslanir. Í spánni er gert ráð fyrir fyrir hóflegri hækkun á fatnaði og skóm í ágúst eða 3-5%. Áhrifin koma svo að fullu fram í september.

Gengisáhrif enn til staðar

Krónan hefur lítið breyst síðastliðna tvo mánuði en gengisvísitalan hefur sveiflast á bilinu 230-235 frá því í byrjun júní. Frá því að krónan var sterkust um miðjan mars hefur hún veikst um rúmlega 20% samkvæmt gengisvísitölunni. Talið er að verð á ýmsum innfluttum vörum, svo sem matvöru og bifreiðum, haldi áfram að hækka.

Þó er ljóst að minnkandi eftirspurn ætti að öllu jöfnu að draga úr svigrúmi til hækkana og því er gert ráð fyrir hóflegum hækkunum á þessum liðum.



Verðhækkun á mjólkurvörum og eldsneyti



Auk gengisáhrifanna má einnig reikna með því að mjólkurvörur hækki um að meðaltali 3,5% milli mánaða en boðuð hafði verið hækkun á heildsöluverð mjólkur frá 1. ágúst.

Þá hefur eldsneytisverð hér á landi hækkað um 3-4% frá því um miðjan júlí. Hækkunina má að mestu leyti rekja til hækkunar heimsmarkaðsverðs á olíu sem hefur snarhækkað síðustu vikur.

Áfram sveiflukennd áhrif af lækkun fasteignaverðs

Fasteignaverð er um þessar mundir enn stærsti óvissuþátturinn í verðlagsþróuninni til skemmri tíma litið þar sem áhrif fasteignaverðs á vísitöluna hafa verið mjög sveiflukennd að undanförnu.

Verðbólga undir 2,5% á fyrri hluta næsta árs

Flest bendir til þess að verðbólga muni haldast áfram að dragast saman þegar líður á árið og samkvæmt spá Hagfræðideildarinnar ætti verðbólga að mælast í námunda við 2,5% verðbólgumarkmið Seðlabankans á fyrri hluta næsta árs.

Forsendur spánnar um hratt lækkandi verðbólgu byggir á áframhaldandi eftirspurnarslaka og lækkun fasteignaverðs en gengisþróun krónunnar mun svo ráða úrslitum um framhaldið.