Ålandsbanken gengur frá kaupunum á Kaupþingi í Svíþjóð

Gengið hefur verið frá kaupum Ålandsbanken á Kaupþingi í Svíþjóð. Kaupverðið er 414 milljónir sænskra kr. eða um 5,7 milljarðar kr. og var það greitt út í hönd.

Í tilkynningu um málið á heimasíðu Ålandsbanken segir Peter Wiklöf forstjóri bankans að það hafi lengi verið ætlun bankans að hasla sér völl í Svíþjóð. Með kaupunum á Kaupþingi fái bankinn strax um 20.000 viðskiptavini á þessum markaði.

Fram kemur í máli Wiklöf að kaupin geri það að verkum að viðskipti bankans aukist um 20%. "Við höfum greint og rannsakað Kaupþing í Svíþjóð og í ljós kom að um hágæða starfsemi var að ræða með hæfu starfsfólki og góðum viðskiptavinatengslum," segir Wiklöf.

Fyrirtækjalán Kaupþings í Svíþjóð og nokkrar aðrar eignir munu færst til skilanefndar Kaupþings á Íslandi við kaupin. Þá mun skilanefndin einnig taka við áhættu bankans af hruni Lehman Brothers á síðasta ári.

Málaferli sem í gangi eru gegn Kaupþingi munu ekki hafa áhrif á starfsemi Ålandsbanken og neyðarlán sem sænska ríkið veitti Kaupþingi mun verða endurgreitt að fullu.