Ellefu milljarða króna skuld eftir misheppnuð hlutabréfakaup

Þrjú félög athafnamannsins Sigurðar Bollasonar skilja eftir sig ellefu milljarða króna skuld eftir misheppnuð hlutabréfakaup í Landsbankanum, Glitni og Existu á árinu 2008. Allar eignirnar eru verðlausar og þurfa lánadrottnar Sigurðar því að öllum líkindum að afskrifa milljarðana ellefu.

Hann keypti 1,37% hlut í þremur skömmtum í Landsbankanum í júlí og ágúst í fyrra í gegnum félag sitt Sigurður Bollason ehf og greiddi fyrir það þrjá og hálfan milljarð króna. Hlutirnir voru, eftir því sem fréttastofa kemst næst, að mestu leyti keyptir af Landsbankanum með láni frá bankanum sjálfum. Þessir hlutir eru verðlausir en samkvæmt ársreikningi stendur eftir 4,5 milljarða króna skuld.

Sigurður keypti einnig hlut í Glitni á síðasta ári í gegnum félag sitt S.Á. Bollason ehf. Sigurður greiddi rúma fjóra milljarða fyrir hlutinn og eftir því sem næst verður komist var Glitnir bæði söluaðili hlutanna og lánveitandi. Hlutabréf í Glitni eru einskis virði í dag og félagið skuldar 4,6 milljarða.

Þriðju hlutabréfkaup Sigurðar á síðasta ári voru kaup á 1,16% hlut í Existu í gegnum félag sitt S. Bollason ehf. Hluturinn kostaði um 1,5 milljarð og tók félagið lán fyrir kaupunum á hlutnum. Bréf í Exista eru verðlaus í dag og félagið skuldar 1,8 milljarða.

Samkvæmt ársreikningum félaganna þriggja standa yfir viðræður við lánadrottna um uppgjör á lánssamningum sem nema um ellefu milljörðum í tilfelli félaganna þriggja. Engar eignir eru til staðar, eingöngu skuldir, sem þarf að öllum líkindum að afskrifa.

Og Sigurður, hann tapar einni og hálfri milljón, upphæðinni sem það kostaði hann að stofna félögin þrjú.

Sigurður Bollason er sonur Bolla kaupmanns sem kenndur er við Sautján. Hann stundaði viðskipti í góðærinu meðal annars með Magnúsi Ármanni sem víða er til rannsóknar. Þá eru kreditkortaviðskipti Sigurðar sjálfs til rannsóknar hjá skattyfirvöldum.