Bagger sagður krónískur lygari

Danska lögreglan trúir ekki framburði fjársvikamannsins Stein Baggers. Hann er sagður krónískur lygari og segir aðstoðarsaksóknari allt eins líklegt að Bagger hafi grafið hluta af þýfinu í eyðimörkinni í Nevada meðan hann var á flótta í Bandaríkjunum.

Fall Stein Bagger var hátt. Hann fór frá því að vera gulldrengur í meintan glæpamann nánast á einni nóttu. Hann var framkvæmdastjóri IT Factory en það fyrirtæki var lýst gjaldþrota eftir að upp komst um svikamyllu hans. Um 90% tekna fyrirtækisins reyndust vera byggðar á svikum Baggers sem m.a. falsaði undirskrift stjórnarformanns fyrirtækisins.Talið er að hagnaður Baggers af svindlinu hafi skilað honum milljörðum í eigin vasa.

Málið var samstundis kært til lögreglu en þá var Bagger horfinn. Í kjölfarið var hann eftirlýstur af Interpol. Bagger gaf sig svo fram við yfirvöld í Los Angeles í byrjun desember eftir að hafa ferðast þvert yfir Bandaríkin. Hann var svo framseldur til Danmerkur en þar sem hann hefur setið í gæsluvarðhaldi. Bagger þykir samvinnuþýður en útskýringar hans eru ekki teknar trúanlegar. Honum er lýst sem krónískum lygara. Hann hefur m.a. haldið því fram að glæpamenn af tyrkneskum og pakistönskum uppruna hafi neytt sig út á glæpabrautina. Þá þykir það ekki trúlegt að Bagger hafi ekki verið í samskiptum við vitorsmenn sína á meðan hann var á flótta auk þess sem ekki komið fram hvað hann var að gera í Bandaríkjunum. Aðstoðarsaksóknari í málinu telur allt eins líklegt að hann hafi grafið peningabúnt í eyðimörkinni í Nevada. Bagger hefur sjálfur viðurkennt að hafa eytt sönnunargögnum, t.a.m. tölvupósti.