Rúmlega 27% strikuðu yfir nafn Guðlaugs Þórs

Um það bil 27% kjósenda Sjálfstæðisflokksins í Reykjavíkurkjördæmi suður strikuðu yfir nafn Guðlaugs Þórs Þórðarsonar, oddvita flokksins í kjördæminu. Þetta kom fram í kvöldfréttum Ríkissjónvarpsins og þar var því jafnframt haldið fram að allar líkur séu á því að Guðlaugur Þór færist niður um eitt sæti.

Sveinn Sveinsson, formaður kjörstjórnar í Reykjavíkurkjördæmi suður, vildi ekki gefa upp neinar töluar þar sem þær liggja ekki endanlega fyrir. Bilun kom upp í tölvukerfi í dag sem tefur vinnsluna. Niðurstaða um fjölda og afleiðingar útstrikana liggur væntanlega fyrir í fyrramálið.

Sjálfstæðisflokkurinn fékk 8209 atkvæði Reykjavíkurkjördæmi suður og þrjá þingmenn kjörna í kosningunum á laugardaginn. Það þýðir að rúmlega 2200 kjósendur hafi strikað yfir nafn Guðlaugs Þórs.