Velheppnað útboð á íbúða- og ríkisbréfum í morgun

Seðlabankinn hélt í morgun útboð á þeim íbúða- og ríkisbréfum sem lögð höfðu verið inn í bankann til tryggingar verðbréfalánum fyrir hrun og ríkissjóður yfirtók í kjölfarið. Í boði voru 4,3 milljarðar kr. í HFF24, 3,2 milljarðar kr. í HFF34, 3,8 milljarðar kr. í RIKB13 og 3,12 milljarðar kr. í RIKB19.

Greining Íslandsbanka fjallar um málið í Morgunkorni sínu. Þar segir að tilkynning um útboðið var send út rétt fyrir lokun markaða í gær og myndaðist nokkur söluþrýstingur á markaði í kjölfarið. Þess má geta að um helgina breyttu flestar Evrópuþjóðir frá sumartíma til vetrartíma, og var opnunartími Kauphallarinnar því framlengdur til kl. 16:30 í stað 15:30 frá og með gærdeginum.

Þrátt fyrir söluþrýsting í lok gærdags heppnaðist útboðið ágætlega. Mestur reyndist áhuginn á HFF34. Tilboð í flokkinn voru 12,2 milljarðar kr. í heildina og voru allir 3,2 milljarðarnir seldir á 4,03% ávöxtunarkröfu.

Þá bárust tilboð að fjárhæð 2,8 milljarða kr. í HFF24-bréfin, og var tilboðum fyrir tæplega 1,8 milljarð kr. tekið á 4,11% ávöxtunarkröfu. Í RIKB13 bárust tilboð að fjárhæð tæplega 3,9 milljarða kr. en alls voru seld bréf í þeim flokki fyrir 1,7 milljarða kr. á 7,3% ávöxtunarkröfu. Loks bárust tilboð að fjárhæð tæplega 4,2 milljarða kr. í RIKB19-flokkinn, en tilboðum var tekið fyrir nærri 2,6 milljarða kr. á 8% ávöxtunarkröfu.

Eftir útboð morgunsins standa eftir í eigu ríkissjóðs HFF24-bréf fyrir 2,5 milljarða kr. að nafnverði, RIKB13-bréf fyrir 2,1 milljarða kr. að nafnverði og RIKB19-bréf fyrir u.þ.b. 550 milljónir kr. að nafnverði.

Framboð ríkistryggðra skuldabréfa úr þessari áttinni er því að langmestu leyti komið fram og má leiða að því líkur að Seðlabankinn muni leitast við að sæta lagi þegar markaðsaðstæður eru með hagstæðasta móti til að losa ríkissjóð við það sem eftir stendur af þessum bréfum.