ISAL með bestan árangur álvera heimsins í minnkun flúors

Staðfest hefur verið af Alþjóðasamtökum álframleiðenda (IAI) að ISAL náði bestum árangri allra álvera heims við að lágmarka losun flúorkolefna árið 2008.

Í tilkynningu segir að flúorkolefni eru sterkar gróðurhúsalofttegundir og stór hluti af heildarlosun margra álvera. Losun ISAL á liðnu ári, mæld í CO2-ígildum, nam aðeins 23 kg á hvert framleitt tonn af áli en meðalálver losar um 700 kg. Með því að skara fram úr á þessu sviði losar álverið í Straumsvík 130 þúsund tonnum minna af CO2-ígildum á ári en ef losun þess væri í meðallagi.

Frá árinu 1990 hefur ISAL minnkað losun CO2-ígilda á hvert framleitt tonn af áli um 75%. Sá árangur skýrist fyrst og fremst af samdrætti í losun flúorkolefna.

"Þessi árangur er mjög ánægjulegur og í góðu samræmi við þá stefnu okkar að vera í fremstu röð í allri okkar starfsemi, hafa stöðugar umbætur að leiðarljósi og starfa ávallt í sátt við umhverfi og samfélag," segir Rannveig Rist forstjóri Alcan á Íslandi hf.

"Árangurinn kemur hins vegar ekki af sjálfu sér heldur er hann afleiðing af framúrskarandi þekkingu og þrotlausum metnaði starfsfólks okkar. Til að draga úr losun flúorkolefna þarf að lágmarka tíðni og tímalengd svokallaðra spennurisa í kerum og í því sambandi hefur hæfni og metnaður starfsfólksins skipt sköpum."