Var boðið að verða bankastjóri Landsbankans og Glitnis

Ármanni Þorvaldssyni fyrrum forstjóra Singer & Friedlander var bæði boðið að vera bankastjóri Landsbankans og Glitnis. Þetta kemur fram í bók Ármanns um íslenska viðskiptalífið sem kemur út í þessari viku. Ármann segir að þetta hefði auðvitað þýtt meir peninga og meiri vegsemd fyrir sig.

„Ég er enginn Móðir Theresa fjármálheimsins en ég hafnaði báðum tilboðunum," segir Ármann í bókinni.

Hann segir ennfremur að fyrir flesta þá sem höfðu byggt upp Kaupþing, var hugmyndin að fara til annarra banka eins og fyrir Jóhannes í Bónusi að fara að vinna í Krónunni.

„Ég fékk auðvitað góð laun og mér fannst mikilvægt að vinna með fólki sem var nánast eins og fjölskylda mín. Ég hafði einu sinni gert árangurslausa tilraun til að fara og hafði ekki í hyggu að endurtaka hana."



Val á vínum olli nú heilabrotum

Ármann talar opinskátt um lífernið sem fylgdi því að vera farsæll bankamaður á þessum tímum. Meðal annars segir hann að fyrir hina nýríku íslendinga hafi velgengnin skapað ný og áður óþekkt vandamál. Upp komu ýmis vandamál tengd starfsfólkinu.

„Bílstjórinn var latur, heimilshjálpin þreif illa og barnfóstran ætlað aldrei að vakna á morgnana. Börnin kvörtuðu undan því að vera alltaf að ferðast til staða eins og Courchevel, St. Tropez og Dubai og vildu frekar vera heima og fara út að hjóla. Val á vínum olli nú heilabrotum. Nokkrum árum áður drukku allir gin og tónik. Nú þótti hallærislegt að drekka rauðvín sem var yngra en maður sjálfur."

Ódýra velska útgáfan

Ármann segir að fáir á Íslandi hefðu vitað hver hann væri ef ekki væri fyrir tvær áramótaveislur sem hann hélt í London árin 2006 og 2007. Ármann var á þessum tíma þekktur fyrir að syngja lagið „Delilah" sem Tom Jones söng eftirminnilega á sínum tíma. Í gegnum tíðina hafði hann sungið það í partýum og veiðikofum, en einnig fyrir 1.500 manns á snekkju með mörgum af ríkustu mönnum Bretlands.

Í umræddri veislu gekk Ármann upp á svið þar sem hljómsveit hafði komið sér fyrir, tók í hljóðnemann og sagði:

„Í staðinn fyrir ódýru íslensku útgáfuna skulum við gera þetta í alvöru og fá besta söngvara heims!"

Í kjölfarið mætti sjálfur Tom Jones á svið. Hann segir síðan að margir hafi haldið að um nokkuð góða eftirhermu hefði verið að ræða. Breskur vinur Ármanns sagði meðal annars síðar meir að hann hefði ekki áttað sig á því að þetta væri sjálfur Tom Jones fyrr en eftir fimm lög.

„Ég hitti meistarann baksviðs fyrir uppákomuna og þegar ég var að útskýra með hvaða orðum ég myndi kynna hann, hrökk upp úr mér „Í staðinn fyrir ódýru íslensku útgáfuna, hér er ódýra velska útgáfan!" Steinrunninn andlitin á fylgdarliði hans gáfu til kynna að þarna hefði ég gengið of langt."