Vísitala framleiðsluverðs hækkar um 3,3%

Vísitala framleiðsluverðs í ágúst 2009 var 181,6 stig og hækkaði um 3,3% frá júlí 2009.

Þetta kemur fram á vefsíðu Hagstofunnar. Þar segir að vísitala framleiðsluverðs fyrir sjávarafurðir var 224,7 stig, sem er hækkun um 1,8% (vísitöluáhrif 0,6%) frá fyrri mánuði og vísitala fyrir stóriðju var 191,5 stig, hækkaði um 5,2% (1,7%).

Vísitalan fyrir matvæli hækkaði um 1,1% (0,2%) frá júlí og vísitala fyrir annan iðnað hækkaði um 4,1% (0,8%).

Vísitala framleiðsluverðs fyrir vörur sem framleiddar voru og seldar innanlands hækkaði um 1,8% (0,5%) milli mánaða en vísitala fyrir útfluttar afurðir hækkaði um 3,9% (2,8%).

Frá ágúst 2008 hefur vísitala framleiðsluverðs hækkað um 13,8% og verðvísitala sjávarafurða um 29,9%. Á sama tíma hefur verð á afurðum stóriðju lækkað um 10,6% en matvælaverð hefur hækkað um 14,9%.