Oxymap í samstarf við læknadeild Háskóla Íslands

Háskóli Íslands og Oxymap ehf. gerðu nýverið með sér samning um rannsóknir á sviði súrefnismælinga og mun Oxymap veita Háskólanum styrk vegna stöðu sérfræðings við læknadeild.

Kristín Ingólfsdóttir, rektor Háskóla Íslands, Árni Þór Árnason, framkvæmdastjóri Oxymap og Guðmundur Þorgeirsson, forseti læknadeildar undirrituðu samninginn.

Í tilkynningu segir að við undirritunina gat rektor þess að starf Oxymap væri glæsilegt dæmi um grunnrannsóknir og hagnýtingu þeirra, þverfræðilegt samstarf framúrskarandi vísindamanna í rafmagnsverkfræði og augnlæknisfræði, stúdenta og atvinnulífsins, og nýsköpun sem byggir á háskólastarfsemi.

Frumkvöðlar að Oxymap eru Einar Stefánsson, prófessor við læknadeild Háskóla Íslands, og Jón Atli Benediktsson, prófessor við rafmagns- og tölvuverkfræðideild Háskóla Íslands. Rannsóknir þeirra hafa verið til umfjöllunar víða um heim en þeir tveir hafa í félagi við aðra þróað súrefnismæli fyrir augnbotna sem getur tryggt meðferð við augnsjúkdómum fyrr en áður var kleift.