Íbúða- og bílakaup verða áfram í lágmarki

Aðeins 2,8% Íslendinga telja það mjög líklegt eða frekar líklegt að þeir munu kaupa hús eða íbúða á næstu 6 mánuðum. Hefur þetta hlutfall ekki áður mælst jafn lágt í núverandi kreppu. Um 7,5% telja það líklegt eða frekar líklegt að þeir muni kaupa bíl á sama tímabili.

Fjallað er um málið í Morgunkorni Íslandsbanka en fyrrgreindar staðreyndir koma fram í nýrri könnun Capacent Gallup. Í september í fyrra var hlutfall þeirra sem ætluðu í íbúðakaup 5,5% og í september 2007 eða nálægt hápunktinum á húsnæðismarkaðinum í síðustu uppsveiflu voru 8,3% sem töldu það mjög líklegt eða frekar líklegt að þeir myndu kaupa hús eða íbúða á næstu sex mánuðum. Hlutfallið nú er einungis þriðjungur þess sem það þá var.

Niðurstöðurnar koma ekki á óvart en veltan á íbúðamarkaðinum hefur verið afar lítil undanfarið og fjöldi kaupsamninga í algeru lágmarki. Niðurstöður spurningakönnunarinnar bera það með sér að framundan er magur vetur á þessum markaði. Enda ekki við öðru að búast þar sem varla má reikna með því að hagur heimilanna vænkist þennan veturinn.

Spáð er að atvinnuleysi fari vaxandi, kaupmáttur launa rýrni, skattar fari hækkandi, vextir verði áfram háir og gengi krónu verði áfram lágt. Þá er við því að búast að íbúðaverð fari lækkandi á næstunni og vilja eflaust fáir festa eigið fé sitt í húsnæði við slíkar aðstæður.

Um 7,5% Íslendinga telja það mjög líklegt eða frekar líklegt að þeir muni kaupa bíl á næstu 6 mánuðum samkvæmt ofangreindri könnun Capacent Gallup. Er þetta nokkuð lægra hlutfall en í júní þegar þessi könnun var síðast gerð, en þá töldu 10,8% mjög líklegt eða frekar líklegt að þeir myndu kaupa bíl á næstu 6 mánuðum.

Breytingin er mikil frá því á árinu 2007 en þá töldu 19,3% mjög líklegt eða frekar líklegt að þeir myndu kaupa bíl á næstu 6 mánuðum. Er þetta hlutfall nú með því lægsta sem mælst hefur í þessari kreppu en bifreiðasala og þá sérstaklega sala á nýjum bifreiðum hefur verið í mikilli lægð undanfarið. Í ágúst voru nýskráðir 189 nýjar bifreiðar samanborið við 2.141 í sama mánuði 2007. Samdrátturinn á þessu tímabili er 91%.