Yfir 70 milljarða viðsnúningur á vöruskiptunum

Fyrstu sex mánuðina 2009 voru fluttar út vörur fyrir 211,8 milljarða króna en inn fyrir 178,8 milljarða króna . Afgangur var því á vöruskiptunum við útlönd sem nam tæpum 33 milljörðum en á sama tíma árið áður voru þau óhagstæð um 37,8 milljarða á sama gengi. Vöruskiptajöfnuðurinn var því 70,8 milljörðum króna hagstæðari en á sama tíma árið áður.



Þetta kemur fram á vefsíðu Hagastofunnar. Þar segir að í júnímánuði voru fluttar út vörur fyrir 40,7 milljarða króna og inn fyrir tæpa 32 milljarða. Vöruskiptin í júní voru því hagstæð um 8,7 milljarða króna. Í júní 2008 voru vöruskiptin óhagstæð um 3,4 milljarða króna á sama gengi.

Fyrstu sex mánuði ársins 2009 var verðmæti vöruútflutnings 93,8 milljörðum eða 30,7% minna á föstu gengi en á sama tíma árið áður. Sjávarafurðir voru 44,8% alls útflutnings og var verðmæti þeirra 17,1% minna en á sama tíma árið áður.

Útfluttar iðnaðarvörur voru 48,4% alls útflutnings og var verðmæti þeirra 30,2% minna en á sama tíma árið áður. Mestur samdráttur varð í verðmæti útflutnings iðnaðarvara, aðallega áls, en einnig var samdráttur í útflutningi á skipum og flugvélum og á sjávarafurðum.

Fyrstu sex mánuði ársins 2009 var verðmæti vöruinnflutnings 164,6 milljörðum eða 47,9% minna á föstu gengi en á sama tíma árið áður. Samdráttur varð í innflutningi nær allra liða innflutnings, mest í flutningatækjum, hrá- og rekstrarvöru og fjárfestingavöru.