Nýja Kaupþing og skilanefnd SPRON semja um útlán

Nýja Kaupþing og skilanefnd SPRON hafa gert með sér þjónustusamning vegna útlána fyrrum viðskiptavina SPRON. Það skal áréttað að útlánin eru í eigu skilanefndar SPRON en Nýja Kaupþing sér um að þjónusta þau.

Í tilkynningu segir að samningurinn felur í sér að Nýja Kaupþing kemur til með að þjónusta öll útlán til einstaklinga og fyrirtækja s.s. húsnæðislán, skuldabréf, erlend lán, víxla, rekstrarlán o.fl. sem tilheyrðu SPRON.

Þá felur hann í sér alla almenna útlánavinnslu s.s. samskipti við skuldara, breytingar á lánaskjölum, breytingar á greiðslufyrirkomulagi, framlengingu lána og úrvinnsla lána sem komin eru í vanskil.

Á fjórða tug fyrrum starfsmanna SPRON hefur verið ráðinn til Nýja Kaupþings undanfarnar vikur vegna breytinganna og til stendur að ráða fleiri. Flestir starfsmennirnir starfa í afgreiðslum og útibúum bankans.

Búast má við auknu álagi í útibúum bankans og vonumst við til að viðskiptavinir okkar sýni því skilning, segir í tilkynningunni.