Stýrivextir hættir að stýra

Pétur Blöndal, þingmaður Sjálfstæðisflokksins, telur að stýrivextirnir séu hættir að stýra efnhagslífinu vegna mikils peningaframboðs í bönkunum. „Vextirnir eru hættir að hafa áhrif á millibankamarkaði þar sem þeir fjárfestar sem eiga jöklabréf eru hættir að fá stýrivextina og þar af leiðandi hafa þeir ekki áhrif á gengi krónunnar." Seðlabankinn ákvað fyrr í morgun að halda stýrivöxtum óbreyttum en háir stýrivextir styrkja jafnan gengi krónunnar þar sem eftirspurn fjárfesta eftir krónum eykst.

Aðspurður um áhrif óbreyttra stýrivaxta á atvinnulífið sagði Pétur:

„Það sem skiptir mestu máli er að bankarnir geti farið að lána alla þá peninga sem eru í bankakerfinu út í atvinnulífið. Það hefur verið gífurleg aukning a innlánum í bankakerfinu síðan í haust þegar gömlu viðskiptabankarnir fóru í þrot. Til að nýju bankarnir geti staðið við innlánsskuldbindingar sínar þurfa þeir að fá vaxtatekjur á móti en Nýju bankarnir eru ekki einu sinni komnir með efnahagsreikning og eiga því í erfiðleikum með að lána út peninga. Því tel ég brýnna fyrir atvinnulífið að þessir hlutir komist í gagnið heldur en að hafa áhrif á atvinnulílfið í gegnum stýrivexti sem eru hættir að hafa þau áhrif sem til er ætlast, sagði Pétur Blöndal í samtali við Vísi um ákvörðun Seðlabankans.