Spáð óbreyttum 12% stýrivöxtum - Hækkun hugsanleg

Hagfræðideildin segir að í yfirlýsingu nefndarinnar við síðustu vaxtaákvörðun hafi mikil áhersla verið lögð á að veiking krónunnar frá því í mars hafi farið langt fram úr því sem nefndin teldi viðunandi. Auk þess kom fram kom í máli nefndarinnar að haldi krónan áfram að veikjast og kostnaðarhækkanir að velta út í verðlagið sé ekki útilokað að vextir verði hækkaðir.

Á mánudaginn spáði Greiningadeild Íslandsbanka því að stýrivextir yrðu óbreyttir næstu átta mánuði. Því bendir fátt til annars en að hér muni enn ríkja hátt vaxtastig, að minnsta kosti samkvæmt helstu sérfræðingum bankanna.

Þá er einnig tekið fram í áætlun Seðlabankans um afnám gjaldeyrishafta að peningastefnan skuli áfram miða að því að tryggja gengisstöðugleika.

Þrátt fyrir að nokkur jákvæð skref hafi verið tekin í átt að endurreisn íslensks efnahagslífs að undanförnu þá er öðrum mikilvægum verkefnum á sviði ríkisfjármála ólokið.

Þannig hefur smíði efnahagsreikninga nýju bankanna tafist enn frekar og er nú stefnt að því að þeir liggi fyrir í seinasta lagi 14. ágúst. Jafnframt hefur fyrirtaka stjórnar Alþjóðagjaldeyrissjóðsins á málefnum Íslands frestast en næsta útborgun á láni til þjóðarinnar fer því í fyrsta lagi fram um næstu mánaðamót.

Þá ríkir enn mikil óvissa um lyktir Icesave samninga ríkisstjórnarinnar við Holland og Bretland.



Óbreytt vaxtastig torveldar endurfjármögnun erlendra skulda

Við núverandi aðstæður ráða vextir á innlánum í Seðlabankanum miklu um fjármögnunarkostnað banka og vexti í kerfinu.

Því er ljóst að gangi spá Hagfræðideildar um óbreytta vexti eftir, þyngist róðurinn enn við endurfjármögnun erlendra skulda fyrirtækja og einstaklinga þar sem háir vextir hér á landi gera það afar óhagstætt að færa erlend lán yfir í krónur.

Ýmis samtök og fyrirtæki hafa þrýst á Seðlabankann að lækka stýrivexti og innlánsvexti enn frekar og draga þar með úr fjármagnskostnaði bankakerfisins og lánþega þess.

Átökin um stýrivextina snúast ekki síst um það hvort af fórnarkostnaður atvinnulífsins sé einfaldlega of mikill ef vextir haldast háir, samanborið við ávinninginn af því að gengið haldist sæmilega stöðugt og unnt verði að afnema höft á fjármagnsflutningum í áföngum.