Vísitala íbúðaverðs í borginni lækkaði um 10,2% á ári

Vísitala íbúðaverðs á höfuðborgarsvæðinu var 313,9 stig í september 2009 og lækkar um 0,1% frá fyrra mánuði. Síðastliðna 3 mánuði hækkaði vísitalan um 1%, síðastliðna 6 mánuði hefur hún lækkað um 2,7% og lækkun síðastliðna 12 mánuði var 10,2%.

Þetta kemur fram í frétt frá Fasteignaskrá Íslands. Þar segir að vísitala íbúðaverðs á höfuðborgarsvæðinu sýnir breytingar á vegnu meðaltali fermetraverðs.

Birtingu vísitölunnar er ætlað að varpa ljósi á þróun fasteignaverðs samkvæmt þeim gögnum sem liggja fyrir á hverjum tíma. Fasteignaskrá Íslands áskilur sér rétt til að endurskoða vísitöluna aftur í tímann í ljósi fyllri gagna eða fágaðri aðferðafræði. Vísitalan er ekki ætluð til að verðtryggja fjárskuldbindingar.