Landsvaki ósammála niðurstöðu héraðsdóms

Landsvaki lýsir sig ósammála niðurstöðu dóms sem féll í dag í máli átján einstaklinga sem stefndu Landsbankanum og Landsvaka, sem var vörsluaðili peningamarkassjóða Landsbankans. Dómurinn sýknaði stefndu af aðalkröfu en féllst að hluta til á varakröfu stefnenda og eru forsvarsmenn Landsvaka ósammála því. Í yfirlýsingu frá Landsvaka segir að samkvæmt dómnum hafi Landsvaka borið að lækka gengi sjóðsins þann 10. september 2008 vegna frétta um að líkur væru á að ábyrgð vegna XL Leisure Group myndi falla á Eimskip.

„Dómurinn telur að þeir sem innleystu á tímabilinu frá 10. september 2008 til lokunar 6. október hafi fengið of hátt verð fyrir eignarhlut sinn í sjóðnum og þeir sem eftir sátu hafi orðið fyrir tjóni. Landsvaki vill taka fram að niðurfærslur eigna voru að mati félagsins fullnægjandi í ljósi fyrirliggjandi upplýsinga á hverjum tíma."

Landsvaki bendir á að í dómnum sé tekið fram að fjárfestingar sjóðsins hafi verið innan fjárfestingaheimilda og þeirra laga sem gilda um verðbréfa- og fjárfestingarsjóði. Þá segi að markaðssetning Peningabréfa Landsbankans hafi ekki verið villandi varðandi áhættustig og öryggi. Í þriðja lagi kemst dómurinn að þeirri niðurstöðu að kynning sjóðsins hafi verið í samræmi við reglur hans og útboðslýsingu svo og lagaákvæði sem hana varðar og að lokum er bent á að kynningarefni hafi verið skýrt og aðgengilegt og markaðssetning á engan hátt villandi.