Lánshæfiseinkunn Landsvirkjunar lækkuð

Matsfyrirtækið Standard & Poor's hefur lækkað lánshæfiseinkunn Landsvirkjunar vegna erlendra skuldbindinga úr BBB-(athugunarlisti) í BB (stöðugar horfur). Lánshæfi á innlendum skuldbindingum lækkar einnig í BB (stöðugar horfur).

Í tilkynningu segir að breytingin hafi, að öllu öðru óbreyttu, neikvæð áhrif á aðgengi Landsvirkjunar að nýju lánsfjármagni á ásættanlegum kjörum.

Landsvirkjun fékk fyrst lánshæfiseinkunn árið 1998 og er þetta í fyrsta sinn sem fyrirtækið fær einkunn sem er lægri en sambærileg einkunn ríkissjóðs.

Í láns­samningum Landsvirkjunar eru engin ákvæði sem kalla á uppsögn eða breytingar þó að lánshæfi lækki. Breytingin nú hefur því engin áhrif á vaxtakjör á eldri lánum fyrirtækisins.