Húsnæði 101 Hótels yfirveðsett

Veð upp á rúma 1,2 milljarða króna hvíla á húsinu við Hverfisgötu 8-10 þar sem 101 Hótel er til húsa. Skilanefnd Landsbankans er með veð að andvirði 910 milljónir króna.

Morgunblaðið segir að um sé að ræða tryggingabréf sem gefið hafi verið út 30. júní síðastliðinn af þeim Jóni Ásgeiri Jóhannessyni og Ingibjörgu Pálmadóttur eiginkonu hans, sem eiga hótelið. Tilurð tryggingabréfsins megi rekja til þess að Jón Ásgeir veðsetti lúxusíbúðir sínar í New York í óþökk skilanefndarinnar, en Landsbankinn fjármagnaði kaupin á þeim árið 2007.

Segir Morgunblaðið að veðtryggingin vegna 101 Hótels sé aðeins ein aðgerð af mörgum sem skilanefnd Landsbankans hafi gripið til með það fyrir augum að tryggja hagsmuni sína gagnvart Jóni Ásgeiri. Fasteignin sem hýsi 101 Hótel sé yfirveðsett í dag, en markaðsvirði þess sé um 650-750 milljónir samkvæmt mati fasteignasala.