Rússar segja að ekkert liggi á láni til Íslendinga

Dmitry Pankin aðstoðarfjármálaráðherra Rússlands segir að ekkert liggi á því að afgreiða lán Rússa til Íslendinga þar sem þeir hafi ekki sérstaka þörf fyrir lánið í augnablikinu. Þetta kemur fram í viðtali PRIME-TASS fréttastofunnar við Pankin en Reuters greinir frá því.

Fram kemur í máli Pankin að þótt gengið yrði til samninga nú yrði lánið ekki veitt fyrr en á næsta ári. Sendinefnd á vegum íslenskra stjórnvalda fór til Rússlands í síðustu viku til að semja um lánið.

„Það liggur ekkert á því af hálfu Rússa að veita lánið. Að öllum líkindum verður rætt um nauðsyn þess að taka ákvörðun til lengri tíma...hugsanlega verður eitthvað látið af hendi rakna 2010," er haft eftir ráðherranum.

Pankin segir jafnframt að allar upplýsingar sem fyrir liggi verði skoðaðar og síðan settar saman í skýrslu til stjórnar Rússlands sem tekur lokaákvörðun í málinu. Um er að ræða 500 milljónir dollara eða um 64 milljarða kr.

Aðspurður um hvort Íslendingar geti ekki fengið lánið á þessu ári ítrekaði Pankin að engar ákvarðanir hefðu verið teknar.

Upphaflega var rætt um að lán Rússa næmi 4 milljörðum evra en Rússar töldu þá upphæð alltof háa og sögðu 500 milljónir dollara vera lagi.

Síðan þá hefur efnahags Rússlands tekið mikla dýfu niður á við og er landið nú í fyrstu kreppu sinni á síðustu 10 árum. Landið hefur þurft að nota þriðjung af gjaldeyrisforða sínum til að halda gengi rúblunnar á floti.

Pankin sagði Reuters fyrir mánuði síðan að þegar upphaflegu viðræðurnar um lánið hófust hafi Rússar ekki átt von á að staða þeirra yrði jafnslæm og hún er nú. Hann bætti svo við að hann gæti ekki sagt um hvort málið hefði alveg verið slegið út af borðinu.