Spá óbreyttum stýrivöxtum næstu átta mánuði

Greiningardeild Íslandsbanka spáir því að peningastefnunefnd Seðlabanka Íslands muni haldi stýrivöxtum óbreyttum í 12% næstu átta mánuði eða fram í apríl á næsta ári. Næsti vaxtaákvörðunardagur nefndarinnar er á fimmtudag.

Í Morgunkorni greiningardeildarinnar segir að í fundargerð peningastefnunefndar frá síðustu vaxtaákvörðun komi skýrt fram að styrking krónu frá því gildi sem hún stóð í við síðustu vaxtaákvörðun væri forsenda vaxtalækkunar. Gengi krónunnar hafi lækkað um ríflega prósent frá vaxtaákvörðuninni í byrjun júlí og því sé ólíklegt að það muni hækka fram að vaxtaákvörðunardegi bankans. Þá segir í Morgunkorninu að mikið framboð sé af lausu fé á peningamarkaði og að markaðsvextir hafi verið að lækka. Markaðsvextir séu nú undir stýrivöxtum.

Ráðgjöf AGS nýtur hljómgrunn innan nefndarinnar

„Þrátt fyrir að nokkuð hafi miðað áfram í efnahagsáætlun Alþjóðagjaldeyrisjóðsins og stjórnvalda frá síðustu vaxtaákvörðun í byrjun júlí sem ætti að öllu jöfnu að gefa tilefni til slökunar er útlit fyrir að þróun á gengi krónunnar og verðbólgu verði enn óviðunandi að mati peningastefnunefndarinnar þegar hún tekur ákvörðun sína í vikunni," segir í Morgunkorninu.

Þar segir jafnframt að frestun á öðrum áfanga láns AGS ásamt lánum frá hinum Norðurlöndunum til að styrkja gjaldeyrissjóðsins sé líklegt til að draga úr vilja nefndarinnar að lækka stýrivexti bankans.

„Þessu til viðbótar er ljóst að Alþjóðagjaldeyrissjóðurinn mælir ekki með frekari vaxtalækkunum en reynslan hefur sýnt að ráðgjöf sjóðsins nýtur töluverðs hljómgrunns innan peningastefnunefndar.“

Spá 7,5% stýrivöxtum í árslok 2010

„Við reiknum með því að peningastefnunefnd Seðlabankans muni halda stýrivöxtum Seðlabankans óbreyttir fram á 2. ársfjórðung næsta árs," segir í greiningardeildin.

Fyrirhugað afnám gjaldeyrishafta ásamt væntanlegri þróun krónunnar mun að mati greiningardeildarinnar kalla á óbreytta stýrivexti fram að þeim tíma. Ekki sé þó hægt að útiloka að peningastefnunefnd bankans ákveði að hækka vexti bankans á þessum tíma.

Að því tilskyldu að framvindan í áætlun AGS og stjórnvalda verði líkt og að er stefnt ættu að skapast forsendur fyrir hækkun krónunnar á næsta ári og að samhliða þeirri þróun verði slakað á aðhaldinu í peningamálum, að mati greiningardeildarinnar.

„Er þetta ástæða þess að við spáum því að peningastefnunefnd bankans byrji að lækka vexti aftur í upphafi 2. ársfjórðungs á næsta ári og geri það í nokkrum þéttum en frekar varfærnum skrefum. Spáum við því að stýrivextir bankans verði komnir í 7,5% í lok næsta árs eða 4,5 prósentustigum lægri en þeir eru nú. Um mitt ár 2011 verða stýrivextir Seðlabankans komnir niður í 6% að okkar mati.“