Húsleit hjá Hannesi Smárasyni

Efnahagsbrotadeild ríkislögreglustjóra gerði húsleit að Fjölnisvegi 9 og 11 í morgun en þau hús eru skráð á eiginkonu Hannesar Smárasonar annarsvegar og hinsvegar á eignarhaldsfélag sem er í eigu Hannesar. Einnig var gerð húsleit hjá lögfræðistofunni Logos í tengslum við málið.

Samkvæmt heimildum fréttastofu beinist rannsóknin að hugsanlegum skattalagabrotum tengdum nokkrum félögum sem tengjast FL Group og Hannesi Smárasyni. Rannsókn er á frumstigi.

Það hefur verið margt um manninn á Logos í morgun því menn frá embætti sérstaks saksóknara gerðu þar einnig húsleit í morgun í tengslum við kaup sjeiksins Al Thani á 5% hlut í Kaupþingi, líkt og Vísir hefur greint frá.

Gunnar Sturluson faglegur framkvæmdarstjóri Logos er stjórnarmaður í félagi sem Hannes á og einn nánasti viðskiptafélagi Hannesar Smárasonar.

Í samtali við Vísis segist Gunnar Sturluson ekki vera einn nánasti viðskiptafélagi Hannesar. Hann hafi setið í stjórn í félögum Hannesar, en sé þar ekki lengur.

Hannn staðfestir að umræddar húsleitir hafi farið fram hjá Logos í morgun en þær séu alls óskyldar. Hann segir að að þeir sem hafi framkvæmt húsleitirnar hafi fengið þau gögn afhent sem þeir höfðu heimild samkvæmt úrskurði héraðsdóms.