Peningastefnunefndin milli steins og sleggju

Greiningardeild Íslandsbanka segir peningastefnunefnd Seðlabankans vera á milli steins og sleggju þar sem bæði Alþýðusamband Íslands og Samtök atvinnulífsins krefjist að stýrivextir Seðlabankans verði lækkaðir verulega. Þau segi það vera forsendu fyrir samningum.

„Seðlabankinn er þá í þeirri stöðu að ef hann lækkar vexti lítið á morgun þá kann það að veikja stöðuna í kjarasamningunum enn frekar,“ segir í Morgunkorni bankans.

Uppsögn kjarasamninga og þeir erfiðleikar á vinnumarkaði sem í kjölfarið myndu fylgja er eflaust eitthvað sem Seðlabankinn vill forðast, að mati greiningardeildarinnar.

„Á hinum vægnum er Alþjóðagjaldeyrissjóðurinn með væntanlega ákvörðun sína um frekari lánafyrirgreiðslur til landsins og þá sína afstöðu um að ekki séu forsendur til að lækka vexti frekar nú.“

Þannig sé peningastefnunefnd Seðlabankans á milli tveggja elda og spurningin sú hversu sjálfstæð hún geti verið við þær aðstæður í vaxtaákvörðun sinni.