Eigið fé Landic Propety er neikvætt

Í tilkynningunni segir að eins og áður hefur komið fram vinnur Landic Property hf. að fjárhagslegri endurskipulagningu á rekstri félagsins. Þann 16. apríl tilkynnti félagið að gengið hefði verið frá sölu á fasteignasafni félagsins í Finnlandi og jafnframt að skrifað hafi verið undir samning um sölu á dönskum og sænskum dótturfélögum.

Í framhaldi af því sótti félagið um greiðslustöðvun til þess að gæta jafnræðis meðal kröfuhafa Landic Property hf. á meðan lokið er við endurskipulagningu félagsins og gengið frá samningi um sölu eigna.

Þann 29. apríl s.l. tilkynnti félagið að það muni ekki birta uppgjör sitt fyrir árið 2008 fyrir lok apríl. Landic Property hf.vill upplýsa markaðinn um eftirfarandi þætti varðandi stöðu félagsins. Fyrir liggur að eigið fé félagsins var neikvætt samkvæmt drögum að óendurskoðuðu uppgjöri ársins 2008.

Áætlun félagsins um endurskipulagningu miðast meðal annars að því að endurreisa eiginfjárstöðu félagsins. Gert er ráð fyrir að eigendur ótryggðra skuldabréfa, þ.e. eigendur skuldabréfa í flokkunum STOD 03 1, STOD 06 1, STOD 06 2 og STOD 09 0306, breyti kröfum sínum í hlutafé í félaginu.