Stjórnendur búast við enn frekari verslunarsamdrætti

Horfur eru á að verslun gæti dregist enn frekar saman á næstunni og lítilsháttar fækkun verði í fjölda starfsmanna. Þetta á sérstaklega við um litlar verslanir. Þetta kom fram í niðurstöðum könnunar sem Rannsóknasetur verslunarinnar gerði nýlega meðal stjórnenda í verslun.

Sambærileg könnun var gerð fyrir ári síðan. Þá mat um helmingur stjórnenda í verslun horfur stöðugar það sem eftir lifði ársins og fjórðungur átti von á samdrætti. Nú telja 61% stjórnenda að búast megi við minni veltu á síðari helmingi ársins. Þeir sem núna telja að veltan muni minnka seinni helming ársins miðað við sama tíma síðasta árs telja að samdrátturinn verði að meðaltali um 27,5% að raunvirði.

Allflestir sem tóku þátt í könnuninni töldu að starfsmannafjöldi yrði óbreyttur á seinni hluta þessa árs. Útlitið er þó heldur dekkra í augum stjórnenda og eigenda lítilla verslana því um þriðjungur þeirra telja að fækka þurfi starfsmönnum um að jafnaði um 32,5%. Tveir af hverjum þremur stjórnenda lítilla verslana telja hins vegar að starfsmannafjöldi verði óbreyttur út árið.

Stjórnendur stórra verslana eða verslanakeðja töldu í 71% tilvika að starfsmannafjöldi yrði óbreyttur út árið, 22% að starfsmönnum fækki og 7% að fjölgun yrði. Þeir sem töldu að fækka þyrfti starfsmönnum í stærri verslunum áætla að sú fækkun verði að meðaltali um 10% en þeir sem sögðust áætla fjölgun töldu hana verða um 7,5% að meðaltali.

Spurt var hvort gera mætti ráð fyrir auknum umsvifum verslunarinnar á seinni helming þessa árs, til dæmis með fjölgun eða stækkun verslana eða samdrætti.

Langflestir gerðu hvorki ráð fyrir auknum umsvifum né samdrætti eða 79% svarenda. Um 18% töldu að verslunum myndi fækka eða samdráttur yrði á síðari hluta ársins og 3% að umsvif sín myndu aukast.

Þá leiddi könnunin í ljós að 46% svarenda telja að samkeppni í veslun muni aukast á seinni hluta ársins, 33% að hún verði óbreytt og 21% að hún minnki þegar líður á árið.