Skuldabréf gömlu bankanna reynast gullnáma

Bandarískir vogunarsjóðir sjá gróðavon í kaupum á skuldabréfum gömlu bankanna. Bréf gamla Landsbankans þykja verðlausir pappírar sem fáir vilja eiga.

Líflegur markaður hefur verið með skuldabréf Glitnis og gamla Kaupþings á erlendum fjármálamörkuðum frá því snemma á árinu.

Fjárfestar keyptu bréfin með 95 til 98 prósenta afslætti skömmu eftir ríkisvæðingu bankanna fyrir ári. Verð þeirra hefur margfaldast síðan þá, er nú fjórfalt til ellefufalt hærra. Þetta fer þó bæði eftir þeirra mynt sem bréfin eru í og skuldabréfaflokkum.

Eftir því sem næst verður komist er lítil ef nokkur hreyfing á skuldabréfum gamla Landsbankans. Ástæðan er sú að verri tryggingar voru á bak við lán bankans og afar ólíklegt að skuldabréfin skili eigendum þeirra nokkru. Áhættan með kaupum á skuldabréfum gamla Landsbankans er því mun meiri en hinna.

Eftir því sem næst verður komist eiga lífeyrissjóðirnir enn skuldabréf gömlu bankanna í krónum. Þeir hafa setið á þeim frá í fyrra og ekki losað sig við þau þrátt fyrir mikið verðfall. Lítil hreyfing hefur því verið á skuldabréfum bankanna í krónum á innlendum mörkuðum.

Bandarískir vogunarsjóðir hafa upp á síðkastið leitað eftir því að kaupa skuldabréf gömlu bankanna af evrópskum bönkum og fjármálafyrirtækjum sem vilja losna við bréfin úr bókum sínum.

Viðmælendur blaðsins segja ekki loku fyrir það skotið að starfsmenn gömlu bankanna og innlendir aðilar með þekkingu á skuldabréfamarkaði hafi sömuleiðis keypt skuldabréfin í gegnum miðlara. Erfitt er þó að greina hverjir eiginlegir kaupendur eru þar sem kaupin eiga sér alla jafna stað í gegnum verðbréfasjóði og fjármálafyrirtæki jafnt hér sem erlendis og eru fyrirtækin skráðir eigendur bréfanna. Flestir telja að hulunni verði svipt að hluta af raunverulegum eigendum bankanna þegar endanleg aðkoma kröfuhafa að þeim verður tekin.

jonab@frettabladid.is