Spáir 2,0 prósentustiga stýrivaxtalækkun

Greining Íslandsbanka væntir þess að peningastefnunefnd Seðlabankans ákveði að lækka vexti bankans um 2,0 prósentustig á vaxtaákvörðunardegi bankans 4. júní næstkomandi. Fara vextir bankans þá úr 13,0% niður í 11,0%.

Greiningin segir í Morgunkorni sínu að slík lækkun verður að teljast umtalsverð samkvæmt skilgreiningu Seðlabankans þó svo að ýmsir kunni að telja hana hóflega við núverandi aðstæður í efnahagslífinu.

Óvissan er í þá átt að lækkunin gæti orðið minni. Líklegt er að nefndin fylgi eftir fyrri yfirlýsingu sinni um að með því að lýsa yfir að á næstunni verði vaxtalækkanirnar hægari.

Ýmislegt hefur þó gerst að mati greiningarinnar sem kanna að draga úr vilja peningastefnunefndarinnar til að lækka stýrivexti. Byggði yfirlýsing nefndarinnar um umtalsverða lækkun núna í júní t.d. á forsendum um stöðugleika krónunnar enda er það skammtímamarkmið peningastefnu bankans. Frá fundi nefndarinnar í maí hefur gengi krónunnar hins vegar lækkað um 4,8% sem er umtalsvert.

Yfirlýsingin byggði einnig á þeirri forsendu að aðhald í ríkisfjármálum yrði aukið núna í sumar með verulegum niðurskurði útgjalda, hækkun skatta og öðrum tekjuaukandi aðgerðum. Áætlun ríkisstjórnarinnar um þetta hefur enn ekki litið dagsins ljós.

Hraðari verðhjöðnun er reiknað var með var ein af ástæðum umtalsverðrar lækkunar nefndarinnar á stýrivöxtum bankans í maí. Nú hefur verðbólgan hins vegar lækkað minna en vænst var en samkvæmt upplýsingum sem Hagstofan birti í morgun fór verðbólgan úr því að vera 11,9% í apríl niður í 11,6% í maí.

Ýmislegt gæti hins vegar orðið til þess að nefndin haldi sínu striki og lækki vexti umtalsvert. Vísbendingar eru um að hratt dragi úr innlendri eftirspurn og er slakinn á vinnumarkaði vaxandi. Framleiðsluslakinn er því að aukast og eini verðbólguþrýstingurinn sem líklegur er á næstunni kemur frá frekari gengislækkun krónunnar.