Tekist á um Securitas

Þrotabú Fons vinnur nú að því að hámarka virði eigna búsins en þær eru flestar talsvert veðsettar. Nýi Landsbankinn gerði kröfu í dótturfélag Fons, öryggisfyrirtækið Securitas, og vildi meina að hann ætti veðkröfu í félagið.

Fyrirtækið er verðmætasta innlenda eignin í þrotabúinu. Þessu hafnaði skiptastjóri og hefur málinu nú verið vísað til héraðsdóms Reykjavíkur.

Skiptastjóri hefur átt í viðræðum við Landsbankann um að hefja söluferli á Securitas og söluandvirðið þá varðveitt á sérstökum fjárvörslureikningi þar til leyst hefur verið úr ágreiningi aðila fyrir dómstólum.

Staðfesti dómstólar að bankinn eigi ekki veðkröfu í Securitas kemur söluandvirðið til úthlutunar til allra kröfuhafa búsins.