Kröfur í þrotabú Landsbankans streyma inn í sendibílavís

Kröfur í þrotabú Gamla Landsbankans berast nú slitastjórn bankans í sendibílavís. Kröfulýsingarfrestur í þrotabúið rennur út á miðnætti. Ætla má að það taki slitastjórnina um þjár vikur að taka afstöðu til krafna, en opinn kröfuhafafundur verður haldinn 23. nóvember.

Forgangskröfur í búið eru væntanlega kröfur vegna Icesave reikninga og launakröfur. Dæmi munu vera um að starfsmenn, sem héldu vinnu sinni eftir hrun, en lækkuðu verulega í launum, geri kröfu um mismun launanna, í uppsagnarfresti.

Fram kom í fréttum Stöðvar 2 í gærkvöld að kröfur fyrrverandi starfsmanna og stjórnenda gömlu bankanna kynnu að nema milljörðum króna. Þá eru dæmi um að menn reyni allt til að hækka kröfur sínar, meðal annars að krefjast bóta vegna svefnleysis og bónusa fyrir vel unnin störf.

Enn heyrir fréttastofa að gerðar verði kröfur í bú gamla Landsbankans vegna peningamarkaðssjóða, en margir telja sig illa svikna af því að hafa geymt þar fé. Svo gæti farið að fjölmörg dómsmál spretti af ákvörðunum um hvaða kröfur teljist vera forgangskröfur í búið. Fari svo, kann að vera að ekki verði byrjað að greiða út úr þrotabúinu fyrr en næsta sumar.