Dæmt í peningamarkaðssjóðsmálum í dag

Fyrstu dómarnir í máli gegn einum af gömlu bönkunum verða kveðnir upp í Héraðsdómi Reykjavíkur í dag. Niðurstaðan mun hafa fordæmisgildi.

Um er að ræða 18 mál gegn gamla Landsbankanum og Landsvaka, sem var vörsluaðili peningamarkassjóða Landsbankans. Málin snúast öll um rýrnun á eignum í peningamarkaðssjóðum bankans, en eftir hrun fengu þeir sem þar höfðu lagt inn fé sitt aðeins tæp 69 prósent endurgreidd.

Hópur þeirra sem varð fyrir skerðingunni ákvað að höfða mál á hendur Landsvaka og Landsbankanum, til að fá leiðréttingu - meðal annars á þeim forsendum að upplýsingar um fjárfestingarstefnu sjóða hafi verið ófullnægjandi. Eignir fólksins voru misháar - námu allt frá hálfri milljón króna upp í 50 milljónir.

Jóhann Hafstein, lögmaður, sem flytur málin, segir niðurstöðu þeirra í Héraðsdómi í dag fordæmisgefandi - sama á hvorn veginn dómar falli.

Á vef Landsbankans sagði að peningamarkaðssjóðirnir fjárfestu í verðbréfum af ýmsu tagi - samsetningin færi eftir þeirri fjárfestingarstefnu sem viðkomandi sjóður fylgdi. Með því að fjárfesta í sjóðum Landsbankans væri hægt að dreifa áhættu af fjárfestingum og draga úr sveiflum í ávöxtun verðbréfasafns. Fjárfestingin væri ekki háð verðbreytingum á einu fyrirtæki eða einum flokki verðbréfa á markaði.