HS Orka ræðir við lánveitendur sína um undanþágur

HS Orka á nú í viðræðum við lánveitendur sína um undanþágur frá núverandi lánasamningum þar sem HS Orka hefur brotið gegn ákvæðum þeirra. Viðræðurnar eru á lokastigi.

Í tilkynningu til kauphallarinnar segir að um síðustu áramót varð ljóst að HS Orka hafði brotið lánsfjárkvaðir helstu lánasamninga vegna mikils falls íslensku krónunnar. Þessa var getið sérstaklega í ársreikningi félagsins og í áritun endurskoðenda.

Nú hefur félagið um nokkurt skeið verið í viðræðum við lánveitendur sína þar sem unnið er að því að félaginu verði veittar undanþágur frá fyrrgreindum lánsfjárkvöðum eða þeim breytt þannig að félagið geti staðið við þær.

Þessar viðræður eru nú á lokastigi en hafa ekki leitt til samkomulags ennþá, líklegt er að það muni gerast bráðlega og mun félagið senda frá sér tilkynningu þess efnis þegar samkomulag hefur náðst.