Loks búið að ákveða aðalmeðferð yfir sjóðsstjóra og miðlara

Fyrirtaka fór fram í máli Daníels Þórðarsonar og Stefnis Inga Agnarssonar í Héraðsdómi Reykjavíkur í dag. Þeir hafa verið ákærðir fyrir að hafa sett inn kauptilboð í skuldabréfaflokk Exista alls sex sinnum frá janúar til febrúar á síðasta ári.

Um var að ræða fimm milljón króna kauptilboð í hvert skipti sem voru lögð fram í Kauphöll Íslands á mánaðartímabili. Tilboðið hafði áhrif á dagslokaverðið og þar með bjuggu þeir til falska eftirspurn auk þess sem verð bréfanna var misvísandi, eins og það er orðað í ákæruskjali.

Málið hefur verið að velkjast í kerfinu í marga mánuðina en í dag var úrskurðað um afhendingu gagna. Síðan var ákveðið að aðalmeðferð málsins ætti að fara fram nú á fimmtudaginn. Vísir greindi frá því að aðalmeðferðina ætti að fara fram í lok október. Þá var henni frestað.

Dómsmálið var upprunalega þingfest í mars síðastliðnum eða fyrir tæpum níu mánuðum. Síðan þá hafa mennirnir meðal annars skipt um verjendur. Þá var Stefnir erlendis í vor og því þurfti einnig að fresta málinul.

Daníel Þórðarson var sjóðsstjóri hjá Kaupþingi en Stefnir Ingi var skuldabréfamiðlari hjá sama banka.

Málið er eitt fyrsta sakamálið vegna brota í aðdraganda bankahrunsins sem hefur ratað fyrir héraðsdóm. Töluverð umræða hefur verið um að í undanfara bankahrunsins, hafi verðbréfamiðlarar reynt að halda gengi bréfa í stóru bönkunum þremur og öðrum félögum uppi, með svipuðum aðferðum og hér um ræðir. Verði Daníel og Stefnir sakfelldir þá geta þeir búist við fangelsi, allt að sex árum samkvæmt lögum um verðbréfaviðskipti.