Björgólfur Guðmundsson gaf út skuldabréfið

Það var Björgólfur Guðmundsson, fyrrverandi formaður bankaráðs Landsbankans, sem gaf út skuldabréfið sem Fyrirtækjabréf Landsbankans keypti fyrir 400 milljónir árið 2005. Eins og fram kom á Vísi fyrr í dag var um að ræða brot á fjárfestingastefnu sjóðsins og hefur málinu verið vísað til Fjármálaeftirlitsins og Rannsóknarnefndar Alþingis.

Fyrirtækjabréf Landsbankans varð síðar að Landsvaka, dótturfélagi Landsbankans. Í fréttatilkynningu frá Landsbankanum kemur fram að eftir bankahrunið hafi nýir stjórnendur tekið við rekstri Landsvaka hf. og ný stjórn skipuð. Það hafi orðið mat þeirra stjórnenda sem þá tóku við, að kaup á áðurnefndu skuldabréfi væri brot á fjárfestingarstefnu sjóðsins.

Þegar ljóst hafi orðið að skuldari bréfsins myndi ekki standa skil á eftirstöðvum við lokun sjóðsins hafi það verið óhjákvæmileg niðurstaða, sem m.a. var byggð á óháðri lögfræðiúttekt, að Landsvaki yrði að bera tjónið sem af brotinu leiddi. Landsbankinn segir því að hlutdeildarskírteinishafar verði ekki fyrir tjóni af þessum sökum.