Skuldabréf gamla Landsbankans hafa fimmfaldast í verði

Skuldabréf gamla Landsbankans hafa fimmfaldast í verði frá bankahruni. Talið er að erlendir fjárfestar kaupi bréfin í þeirri von að þau hækki í verði, ef neyðarlögunum verður hnekkt fyrir dómstólum.

Bankarnir gömlu, fjármögnuðu sig meðal annars með útgáfu skuldabréfa. Það átti líka við gamla Landsbankann.

Skuldabréf hans fóru niður í 1% af virði, eftir hrun; það þýðir að þau gengu kaupum og sölum eftir hrun á genginu 1 eyrir á móti hverri krónu. Bréfin verið að hækka í verði undanfarið. Þau munu nú seljast á 5% prósent af upphaflegu; það er á 5 aura fyrir hverja krónu.

Það er hins vegar margt óljóst í þessu. Til að mynda er lítið vitað um hverjir eiga skuldabréf Landsbankans; engar skrár eru til um slíkt. Þau ganga kaupum og sölum á ýmsum mörkuðum.

Þá er spuning hvað skýrir þessa hækkun á verði skuldabréfanna. Ýmislegt er þó nefnt, til dæmis að menn séu einfaldlega að taka slæmar viðskiptaákvarðanir, þar sem óvíst sé að virði bréfanna eigi nokkurn tímann eftir að aukast.

En viðmælendur fréttastofu nefna fleira til sögunnar. Samkvæmt neyðarlögunum eru innistæður forgangskröfur. Innistæður á Icesave voru svo háar að forgangskröfur vegna þeirra fara langt með eigur allar eigur Landsbankans. Hins vegar er sagt að skuldabréf bankans hækki í verði; vegna þess að sumir fjárfestar, sem hafa keypt þessi bréf, telji víst að neyðarlögunum verði hnekkt fyrir dómi. Verði innistæður ekki lengur forgangskröfur, sé viðbúið að skuldabréfin eigi eftir að hækka verulega í verði, þar sem röð kröfuhafa verður önnur.

Fram hefur komið að fjölmargir erlendir bankar hyggist stefna ríkinu, til þess að fá neyðarlögunum hnekkt.

Sumir nefna að Landsbankabréfin kynnu þá að fara upp í allt að tuttugu og fimm prósent af nafnverðinu; en það myndi þá þýði fimmföldun á fjárestingu þess sem kaupir bréfin á sem nemur 5 aurum fyrir hverja krónu.