Júlíus: Tekur tíma að slípa liðið til

"Ég tel að sé mjög mikilvægt fyrir okkur að fá leiki af því það er talsvert langt síðan við spiluðum," sagði Júlíus Jónasson landsliðsþjálfari þegar hann var spurður út í æfingaleikina þrjá við Svisslendinga.

Kvennalandsliðið í handbolta spilar í kvöld fyrsta æfingaleik sinn af þremur við Svisslendinga í Framhúsinu, en liðin leika þrisvar á þremur dögum.

"Reyndar höfum við spilað við mjög sterk lið í síðustu leikjum, en það er líka mjög gott að fá svona leiki alveg í restina þar sem við getum verið að æfa leikaðferðir. Ég hef verið að yngja liðið upp á þeim tíma sem ég hef verið hérna og það tekur einhvern tíma að slípa þetta til og búa til lið,"

Júlíus var því næst spurður út í möguleika íslenska landsliðsins þegar í alvöruna kemur í haust þegar það tekur þátt í forkeppni EM og mætir þar m.a. sterkum liðum Frakklands og Austurríkis.

"Möguleikarnir eru alltaf fyrir hendi. Frakkarnir eru með sterkasta liðið. Austurríki er dálítið spurningamerki en hefur verið ofarlega á blaði síðustu ár og við erum sett í þriðja styrkleikaflokk þarna. Fyrirfram er þetta mjög erfitt, en við erum í þessu til að setja okkur markmið og klára þau. Við stefnum á að reyna að vinna þennan riðil, þó það verði erfitt," sagði Júlíus.

Æfingaleikir landsliðsins gegn Sviss verða sem hér segir:

Mánudagur 18. maí kl. 19.30 Framhús Reykjavík

Þriðjudagur 19. maí kl. 19.30 Íþróttahúsið á Selfossi

Miðvikudagur 20.maí kl. 18.00 Íþróttahúsið Austurberg