Nýsir hf. sektað um tíu milljónir króna

Fjármálaeftirlitið hefur tekið ákvörðun um að sekta Nýsi hf. um tíu milljónir króna vegna þrenns konar brota á lögum um verðbréfaviðskipti á nokkurra mánaða tímabili á síðasta ári.



Fyrsta brotið

Þann 14. janúar 2008 staðfesti Kauphöllin, verðbréfalýsingu Nýsis hf. vegna víxils.

Nýsir greindi ekki frá væntanlegri endurfjármögnun í verðbréfalýsingunni en í janúar 2008 lá fyrir að endurfjármagna þyrfti skammtímaskuldir félagsins. Fjármálaeftirlitið komst að þeirri niðurstöðu að Nýsi hafi borið að upplýsa um slíkt í lýsingu í samræmi við lög um verðbréfaviðskipti þar sem endurfjármögnunin snerti fjárhag og framtíðarhorfur félagsins.



Annað og þriðja brotið

Þann 19. mars 2008 féllu skuldabréf/víxlar Nýsis í gjalddaga sem skráð voru í Kauphöllinni.

Nýsir greindi ekki frá ofangreindu á skýran hátt fyrr en 18. júní 2008.

Fjármálaeftirlitið komst að þeirri niðurstöðu að Nýsir hefði brotið gegn áðurnefndum lögum um verðbréfaviðskipti með því að tilkynna ekki um alvarlega stöðu sína þegar ljóst var að félagið gæti ekki staðið við greiðslu á afborgunum skuldabréfa og víxla sem féllu í gjalddaga 19. mars 2008.

Í tilkynningu til Kauphallarinnar þann 2. apríl 2008 sem fylgdi ársreikningi Nýsis, kom fram að félagið stæði frammi fyrir vanda vegna skammtímaskulda og að ef ekki tækist að vinna fram úr honum stæði félagið frammi fyrirbráðavanda.

Fjármálaeftirlitið taldi þá tilkynningu ekki nægilega skýra, en ekki kom fram í henni

að skuldabréf og víxlar félagsins hefðu fallið í gjalddaga.

Þann 1. apríl 2008 náði Nýsir samkomulagi við alla kröfuhafa um greiðslufrest skuldabréfa og víxla sem féllu í gjalddaga 19. mars 2008. Fjármálaeftirlitið komst að þeirri niðurstöðu að Nýsir hefði brotið gegn lögum um verðbréfaviðskipti þar sem félagið birti ekki opinberlega þær upplýsingar.

Það var mat Fjármálaeftirlitsins að framangreind þrjú tilvik sýndu ítrekaða brotlega háttsemi félagsins á 6 mánaða tímabili.

Í ljósi alvarleika brotanna var ekki talið rétt að ljúka málinu með sátt, heldur stjórnvaldssekt.

Við ákvörðun stjórnvaldssektar var litið til alvarleika brotanna, málsatvika og þess tíma sem brotin stóðu yfir. Með hliðsjón af framangreindu og stjórnvaldssektum í sambærilegum málum þótti hæfilegt að sekta Nýsi um 10 milljónir króna.

Nýsir er alþjóðlegt þekkingar- og fjárfestingarfélag, sem stofnað var árið 1991 og var mjög umsvifamikið í einkaframkvæmd áður en félagið var tekið til gjaldþrotaskipta á síðasta ári. Nýsir var annar eigandi Portusar Group ásamt Landsbankanum og sá því um rekstur og uppbyggingu tónlistar- og ráðstefnuhússins.

Nýsir er nú í ríkiseigu.