Um 200 manns starfa hjá skilanefndum gömlu bankanna

Gera má ráð fyrir að um 200 manns starfi hjá skilanefndum þrotabúa Kaupþings, Glitnis og Landsbankans. Rúmlega 60 manns starfa hjá skilanefnd Kaupþings Ef gert er ráð fyrir að fjöldi starfsmanna sé svipaður hjá skilanefndum Glitnis og Landsbankans þýðir að um 200 manns starfa hjá skilanefndum bankanna.

Fréttastofa sendi skilanefndum Kaupþings, Glitnis og Landsbankans fyrirspurn um ýmsa þætti er varða starfsemi þeirra. Fyrirspurnin var send fyrir tveimur vikum en svör hafa ekki enn borist frá skilanefndum Glitnis og Landsbankans.

Ekki fengust svör við því hver samanlögð útgjöld skilanefndar Kaupþings eru frá upphafi starfseminnar. Skilanefndin taldi sér ekki fært að gefa það upp enda hafi þær upplýsingar ekki verið birtar opinberlega og skilanefndin leggur mikið upp úr jafnræði meðal kröfuhafa og vill tryggja að upplýsingar berist til þeirra áður en þær birtast í fjölmiðlum. Síðasta mat á eignasafni gamla Kaupþings var kynnt kröfuhöfum í febrúar. Samkvæmt því mati er áætlað virði eigna bankans 618 milljarðar.

Í svörum Kaupþings kom fram að skilanefndin hafi ekki tekið yfir nein íslensk fyrirtæki. Stærstur hluti fyrirtækjalánasafns bankans sé erlendur og í nokkrum tilfellum hafi verið framkvæmd nauðsynleg endurskipulagning á fyrirtækjum. Dæmi um slíka endurskipulagningu er Mosaic Fashions. Þá hefur Kaupþing sett sína fulltrúa í stjórn nokkurra fyrirtækja sem tilheyrðu eignasafni Robert Tchenguiz. Þess má geta að Tchenguiz var einn stærsti viðskiptavinur Kaupþings og sat meðal annars í stjórn Exista, sem átti ráðandi hlut í bankanum á sínum tíma.

Eina dótturfélagið sem í dag er á forræði skilanefndarinnar er FIH bankinn í Danmörku, en hann er í fullum rekstri og ekki í söluferli. Í lok maí var skipuð slitastjórn yfir bankanum til að hefja formlegt kröfulýsingaferli. Það ferli mun hefjast á næstunni og standa yfir í sex mánuði. Að því loknu verður útbúin skrá yfir kröfur og afstöðu slitastjórnar til hverrar kröfu fyrir sig, og mun það taka talsverðan tíma. Þá verður ýmist hægt að ganga til nauðasamninga eða fara með bankann í gjaldþrotaskipti. Þess má vænta að það taki nokkur ár að ganga frá eignum Kaupþings, sama hvor leiðin verður farin, samkvæmt svörum skilanefndar.

Um 60 manns starfa hjá skilanefndinni. Gera má ráð fyrir að svipaður fjöldi starfi hjá skilanefndum Glitnis og Landsbankans.