Mörg góðgerðarsamtök í klemmu vegna hruns íslensku bankanna

Tæplega 50 góðgerðarsamtök í Bretlandi eru í klemmu vegna hruns íslensku bankanna. Eitt þeirra,sjúkrahótelið Naomi House hefur þurft að leggja af heimahjúkrunarþjónustu við langveik og dauðvona börn vegna glataðra innistæðna hjá Singer & Friedlander banka Kaupþings í London.

Fjallað er um málið á vefsíðu BBC. Þar er m.a. rætt við Sue George móður sem á átta ára stúlku, Holly, sem þjáist af ólæknandi lungnasjúkdómi.

Þær mæðgur búa í Beedon í Berkshire og þar til nýlega gátu þær reitt sig á þjónustu Naomi House en ekki lengur. BBC segir að þær hljóti að vera tvær af saklausustu fórnarlömbum bankahrunsins á Íslandi.

"Þetta hefur haft gífurleg áhrif á líf okkar," segir Sue George. "Ef neyðarástand skapast get ég ekki reitt mig á vini eða nágranna til að líta eftir Holly. Hún þarf á sérfræðiaðstoð að halda."

Áður en Naomi House neyddist til að hætta heimahjúkrun sinni gátu Sue og Holly ætíð reitt sig á þjónustu hótelsins sem sendi strax hjúkrunarkonu á heimili þeirra ef eitthvað kom upp á.

Í frétt BBC kemur fram að samkvæmt regnhlífarsamtökunum The Charity Finance Directors Group áttu 49 góðgerðarsamtök og stofnanir peninga inni á reikningum íslensku bankanna í Bretlandi. Mörg þeirra vilja ekki koma fram opinberlega af ótta við að slíkt myndi hræða stuðningsfólk sitt.

HInsvegar hafa þessi samtök og stofnanir nú myndað stýrihóp og ætla í sameiningu að knýja bresk stjórnvöld til aðgerða í þeirra þágu strax. Það mun taka mánuði ef ekki ár að bíða eftir niðurstöðum úr skiptum á þrotabúum bankanna.