Erlendir fjárfestar með 60 milljarða frosna í desember

Erlendir fjárfestar munu frjósa inni með rúmlega 60 milljarðar kr. nú í desember í kjölfar hinna nýju gjaldeyrisreglna Seðlabankans. Talsvert framboð er í farvatninu af nýjum ríkisbréfum á næstu dögum. Tilgangur þess er fyrst og fremst að mæta eftirspurn vegna gjalddaga ríkisbréfa í desember sem eru að miklu leyti í erlendri eigu.

Fjallað er um málið í Morgunkorni greiningar Glitnis. Þar segir að ríkisbréfaflokkurinn RIKB 08 1212 sé á gjalddaga 12. desember en við það losni um það bil 100 milljarðar kr. að meðtöldum verðbréfalánum til aðalmiðlara. Telur greiningin að allt að tveimur þriðju hlutum þessara bréfa séu í eigu erlendra fjárfesta.

Þessir fjármunir eru nú fastir hér á landi eftir setningu reglna Seðlabankans um gjaldeyrishöft á föstudag. Erlendir fjárfestar munu því væntanlega verða fyrirferðamiklir meðal kaupenda í útboðum á nýjum ríkisbréfum..

Seðlabankinn tilkynnti nýverið um útboð í ríkisbréfaflokknum RIKB 10 0317 sem fara á fram á miðvikudag. Ekkert hámarksviðmið er á magni í útboðinu, en hið svokallaða hollenska fyrirkomulag er viðhaft. Það hefur í för með sér að lægsta verð (og þar með hæsta ávöxtunarkrafa) sem samþykkt er ræður verði og ávöxtunarkröfu til allra kaupenda.